Linard Nicolay
Sculptur
Otg craps
 
Plastica è ina denominaziun extendida per ils corps furmads tras l' activitad artistica che purtava durant las epocas da l'istorgia ils motivs prendids da la natira en ina furma tridimensiunala. Sculptura signifitgescha realisaziun d'in'ovra cun disfar materia stgalprada directamain or dal crap. Las novas lavurs da Linard Nicolay èn damai sculpturas schizunt archetipicas: otg craps ruts lavurads or da marmel da Laas sco materia per l'activitad artistica.
 
A prima vista pari ina cumparaziun anacronistica, da stgalprar en il vair senn dal pled, en nossas realitads maschadadas adina dapli cun munds generads dals computers, sias imaginaziuns en il crap. U ditg autramain: Tge ans din ils otg craps da Linard Nicolay?
 
Contemplain las ovras pli detagliadamain: Ils blocs ruts, gronds sco pachets mantegnan a l'entschatta lur furma natirala, avant co vegnir cumplettads e cuntrastads tras l'elavuraziun artistica da las surfatschas e dals urs. Er las furmas lavuradas sun organicas, vul dir sez emprestadas da la natira. Il dissegn lavurà cun il stgalper enzuglia il crap enturn ed enturn, e perquai na datti ina posiziun predefinida da la sculptura finida, ella po vegnir plazzada sin la basa, en las posiziuns las pli diversas. Ils otg craps na stgatschan betg mo il spazi, ma cumpiglian cun lur averturas il spazi limitrof in lur sfera. Las relaziuns tranter volumen e spazi èn differentas, tut segund sche la massa dal corp para dad esser serrada u averta.
 
En il center da l'expressiun figurativa na stattan betg temas classics da la sculptura sco monumentalitad u allegoria, ma il crap sez. Linard Nicolay renda visiblas, cun intervenziuns bain precisas, las particularitads dal material crap, da sia constituziun, direzza e furma. Averturas sa furman, là nua ch’ellas èn artisticamain tschertgadas e tecnicamain pussiblas, là nua che la natira las ha sugeridas. Lur forza splegan las sculpturas en la tensiun tranter las surfatschas laschadas natiralas e quellas elavuradas. En quest senn na stattan ils otg craps betg mo per sasez, ma pon vegnir legids sco allusiun per l'equiliber periclità tranter il progress da la civilisaziun e la fragilitad da la natira.
 
Jürg Graser, architect Turitg

 
ensi
 

© 2008 Linard Nicolay

D / RUM / F / I / E